吳若希預告 發力收復失地

心繫一對小朋友的吳若希，決心待BB半歲即全面復工，看來菊梓喬都要加把勁喇！

藝人吳若希、張繼聰、洪卓立以及菊梓喬等前晚出席「TVB X QQ音樂」記者會，推廣廣東歌到內地市場。由於今次與無綫合作的QQ音樂平台有8億客戶，為隆重其事，騰訊音樂娛樂集團副總裁侯德洋更現身，與無綫高層樂易玲及何麗全齊於台上主持儀式，眾歌手大感興奮，認為對推動本地樂壇有很大幫助。

活動上，吳若希幾乎全程罩不離口，她直認要相當小心：「話晒屋企有兩個命根（一對小朋友）。」談到新工作，她繼續「慈母上身」謂：「屋企小朋友仲細，想畀多少少時間喺屋企，所以都係《姊妹淘》，同埋錄影《勁歌金曲》咁，做啲瑣碎嘅工作，有時都心急返屋企湊女。（幾時先開始拚搏收復失地？）等BB半歲啦，即係等多1個月左右，之後要正常做嘢，趕進度喇！」

菊梓喬	樂易玲（前排左起）、侯德洋及何麗全主持儀式。

張繼聰相隔4年再踏足電視城，他笑謂：「好開心，見番咁多朋友，只不過我咁耐冇做音樂，（同活動）好似唔係好關事。」他表示近期有搵過王祖藍，並為對方打氣。

洪卓立要識50個人

歌手洪卓立即將出發到內地工作半年，記者打趣問他會否識個女友才返港？他說：「應該會識到異性，相士話我今年要識50個新朋友。（點解？）佢話我愈老會愈宅，要多啲出去先得，而且今年桃花運勁。（閃婚？）到時先算啦。（攞咗隻狗去湯怡度寄養未？）我諗住最後一刻先，自己唔捨得，同埋話晒佢係大肚婆，唔想搞住佢。」