黃婉恩男友陪覆診 閃光彈放題

黃婉恩男友管接管送又細心攙扶，唔冧就假！

約半小時後，Bosco先行步出醫院，準備車輛等候女友，上車前又非常識做上前攙扶，隔住口罩都feel到Yancy冧爆！原來二人緊接到銅鑼灣醫肚，更有默契地選擇餐廳窗邊開揚位置對途人大放閃光彈，由睇餐牌開始到食物送上，全程「蜜蜜斟」，即使拍拖7年，依然如熱戀情侶。之後Yancy拿起漢堡包着男友影相打卡，兩小口又玩自拍，期間Bosco細心為女友整理牛仔褸，Yancy冧笑現腰果眼，即餵食薯條做獎勵。

超級無敵想返工

事後Yancy接受電話訪問，透露已開始做物理治療，每星期去2、3次：「進展唔錯，做物理治療真係好啲，因為佢哋會教我做啲小動作令條筋鬆啲，今次康復得好快，醫院、醫生都幫咗好大忙。」並自爆開刀位置會留疤，但不是很明顯，可以接受。她又指現時除了做物理治療外，基本上都是留在家中：「研究吓煮嘢食、煲劇又練吓廣東話，超級無敵掛住返工，因為我唔可以坐定定，返工學到好多嘢，出去做訪問又見到好多人，就算坐喺廠都好開心，希望快啲康復，快啲開工！」

黃婉恩與男友坐窗邊位置不斷放閃，路人經過無不眼超超。

黃婉恩稱開刀位置會留疤，腳踭啫，可以接受。