宋熙年想做賣魚妹

藝人陳智燊（Jason）及太太宋熙年（Sarah）離開無綫後發展KOL事業，Sarah不認為於幕前時間減少：「如果唔係疫情，佢係每月飛緊去唔同地方拍網上嘢或者電視節目，我哋都構思緊拍自己節目。」Jason坦言有其他電視台傾工作，兩公婆對演戲仍很感興趣，更不介意夫妻檔上陣，Sarah說：「我哋之前試過一齊客串《誇世代》幾場戲，都有興趣，但唔想再做兩公婆，我最想做街市賣魚妹，做啲豪邁嘅角色，畀大家睇到唔同嘅我。」提到老公拍劇難免會有親熱戲，她笑說：「我唔會問，佢亦唔需要備案，大家都係呢行，但如果他日佢拍再激啲嘅就要同我講。」她又乘機幫姊妹「投訴」：「身邊啲朋友話唔想再同佢拍親熱戲，好似高海寧、張曦雯、龔嘉欣，佢哋好抗拒，我就冇咩感覺。」