黃翠如配音如考試 緊張到變聲

無綫新綜藝節目《好聲好戲》昨日舉行拜神儀式，節目主席評判汪明荃、主持阮兆祥及賴慰玲聯同首集嘉賓張振朗、黃翠如、謝嘉怡、鄧智堅等現身，連無綫3位高層曾志偉、王祖藍及何麗全亦到場探班造勢。

振朗孖住翠如受訪，他表示對配音有少少認識，但跟演戲是兩回事，自爆因練聲練到聲沙，又讚翠如配音犀利，翠如聞言即謙虛自認聲音薄弱，指在場的配音老師有給予意見，希望可藉此吸收專業意見：「呢幾日不停練，前幾日喉嚨發炎，一緊張就覺得把聲有問題，消炎藥即刻跟身。」振朗表示現場有不少專業配音員，值得向他們學習，又自爆錄影時坐於台下很緊張：「好耐冇試過咁緊張，對上一次係好多年前參加《星夢傳奇》。」翠如亦說：「就好似去考試咁，大家望住你去畀評語，會搵到自己嘅問題，同時會有番啲意見去改進。」

謝嘉怡廣東話大躍進

同場的應屆港姐冠軍謝嘉怡獻出處女配音，她對全廣東話題目冇有怕，覺得比想像中易：「OK嘅！開頭嗰啲對白慢啲簡單啲，但挑戰第2段快嘅就甩咗。（有冇唔小心爆粗？）冇，練到凌晨3點幾，竟然個效果好啲，可能夜晚易練啲。」

講到現時做訪問對答如流，她開心表示廣東話有進步，打趣問她是否認識了香港男友所以廣東話大躍進？她笑住否認，解釋是狂睇電視學習，而除了跟媽媽視像之外，全以廣東話溝通，又說現階段不想拍拖，想專注工作，亦想嘗試拍劇。