男友有投訴 湯洛雯認衰 瘋狂示愛

湯洛雯（靚湯）前晚在節目與主播俞詠文及陳振安暢談，期間老友高海寧（高Ling）、蔡思貝及朱千雪等一同睇直播及留言。遊戲環節播出她與男友馬國明合作劇集《心理追兇Mind Hunter》的片段，要求她說出當時對白，她成功過關，又直言此乃從演以來咀得最多的作品。

讚高Ling應大則大

有網民追問她喜歡男友哪一點，靚湯即時冧笑，大讚對方專一，又指他是全電視城最靚仔：「佢好有責任感，應承你嘅一定會做。（唔會好悶？）因為我唔悶，一凹一凸先好，佢會不停聽我講。（咁佢有冇唔鍾意你啲咩？）好多，佢有強迫症，好整齊。同埋有時我有啲無理取鬧，不過真係我錯嘅話，事後會講對唔住。（之後會配合佢整齊少少？）有時去佢屋企盡量執好啲嘢，去完Toilet將啲嘢放原位。」之後她接受「完美情人」心理測驗，大談情侶相處之道，坦言平時會撒嬌，亦不時向男友說「我愛你」，又透露有情侶物品。

談到圈中閨蜜，她讚高Ling身材豐滿，雖然為食，但只在「對的地方」長肉。至於蔡思貝，她們因合作拍攝《機場特警》變得熟落，大爆開工時經常講「女仔鹹濕嘢」，令拍檔張振朗相當尷尬。「2 LINE黨」成員張嘉兒、朱千雪及岑杏賢亦有「現身」直播，靚湯趁機代千雪否認有喜，對方卻聯同嘉兒爆料，指她是「Ditch Queen」（放飛機天后），經常爽約，結果被網民改花名做「飛機雯」！

馬國明籲粉絲提防騙案

另外，馬國明官方國際影迷會在社交平台發聲明，指有人冒認他在社交平台售賣投資產品，身在內地拍攝劇集《白色強人II》的馬國明，亦親自錄音作出呼籲：「如果有人用馬明或馬國明嘅名義叫你作出網上投資，甚至叫你借錢，係假嘅！係騙案嚟！大家小心啲！」