胡諾言期待電視城賽跑

陳山聰及姚子羚等「crazy runner」成員，獲無綫「度身訂造」劇集《大步走》，團隊更貼心設定「跑友大暴走」活動與觀眾互動。據悉，無綫早前招募一眾跑友觀眾，參加連續3星期舉行的初賽，每周勝出者除獲贈波鞋外，亦可參與4月6日於電視城舉行的總決賽，跟眾主角同場競技。

身為男主角的山聰說：「屆時應該會有20位參賽者。監製黃偉聲量度過，1圈賽道約1千米，我哋打算跑5個圈，連我自己都係首次喺電視城賽跑，應該好難忘，到時會影多啲相留念。」

而昨日胡諾言則代表劇集與3位素人跑友較量，劇中拍檔陳自瑤亦現身支持。他表示：「最難忘係有位女跑友攞住頂波士頓馬拉松嘅帽畀我簽名，仲話成日跑步想撞見我，點知都冇機會。我知道總決賽嗰日公司邀請咗田徑總會啲高手落場，能夠圍住電視城賽跑，係千載難逢嘅機會。」