黃建東挑戰苦情戲 買樓報親恩

今年是黃建東入行10周年,在娛樂圈算是有點成績,中午有他的洗腦歌《平安郁》,夜晚有他演出的《陀槍師姐2021》,曝光率不低,不過東東透露這些年也曾萌生退出念頭:「我初時唔係行搞笑路線,做到第5年,覺得觀眾唔係好鍾意我,監製又唔係點用我。」正經演戲無出路,後來誤打誤撞下,因為2次創作港版《PPAP》而出位,開始朝搞笑方向發展:「不過做得耐,啲同事又會話黃建東做唔到正經角色,好似做乜都唔啱咁。」直到《陀》劇播出後,有監製表示會讓他嘗試演苦情戲,令他決定繼續在幕前待下去。

負評打不死

東東坦言多年來聽盡不少網民負評:「話我個樣唔得呀,身形變咗阿叔,做戲又浮誇,但惡評打擊唔到我,我只會善意採納。」他坦承身材方面欠管理,比起參選港男時暴脹50磅:「我有壓力會食嘢,心情好又會食。以前有少少暴食症傾向,覺得空虛想放啲嘢入口,其實唔係肚餓,係心理。」他指做舞台劇演員時更曾患輕度抑鬱:「當時剛由紐約返嚟,未適應到個工作文化,有見情緒治療師,發覺要傾,唔可以擺喺個心度。」

獲古天樂鼓勵

幸好除了冷嘲熱諷,東東亦得過不少善意鼓勵,讓他撐下去:「例如古天樂,佢話好鍾意睇我嘅片,覺得我好搞笑、有創意,佢話我會成功,叫我加油,有個電影試鏡都係通過佢而有機會。」而家人對他更是無條件支持:「中七時,我想去外國讀演藝,家人用換樓嘅錢畀我去外國讀書,虧欠佢哋太多,呢個親恩要報答,最想買層樓送畀佢哋。」