變態佬露械攔路 大埔LuLu爆喊狂奔

深受宅男愛戴的大埔LuLu，社交網擁有逾15萬Fans，她不時分享生活點滴，留住Fans的心。前日，她在網上自爆獨自回家時途經僻靜地方，慘遭露體狂騷擾，嚇得花容失色，忍不住爆喊狂奔，她留言：「有個變態特登行去我前面，着住條開洞露下體嘅褲，嚇到即刻跑走，忍唔住喊。各位女仔一個人返屋企嘅時候，揀啲多人嘅地方行。」大批網民「洗版」慰問，慶幸她有驚無險。

有陰影 改路返家

講起驚險經歷，她昨日接受本報訪問時猶有餘悸，指露體狂是1名年約30多歲的慣犯，當時對方身穿橙色風褸及白色緊身褲，下身位置開窿坦蕩蕩於人前，她說：「有個住附近嘅朋友都見過佢！我朋友勇敢啲，冇畀反應直行直過，但我就嚇到聲都出唔到跑走！嗰陣大概係10點幾11點，仲要條好光猛嘅隧道入面，其實我落車嗰陣都覺得呢個人好奇怪，但我冇理就落斜行過去，佢特登喺另一邊衝落樓梯，企定喺中間擘大對腳嚇我，個樣仲好開心，覺得有人陪佢玩！」

她指當日行完山體力透支，但仍出盡奶力跑走，幸好成功脫險：「走甩之後，我都有離遠睇佢有冇追住我，見到佢踎低唔知做乜，冇理喇！（又同緋聞男友Gordon行山？）唔係。（佢有冇慰問你？）冇留意添！以後寧願行遠少少返屋企，自己一個女仔真係唔夠膽行，有陰影！」

至於Gordon坦言知道對方受驚，已送上慰問，問會否自薦做「柴可夫」管接送，他說：「如果佢需要嘅話，我非常樂意車佢呀！」大埔LuLu得悉後冧爆回覆：「哈哈！多謝佢先，不過唔希望再遇到呢啲經歷啦！」