陳豪離家出走為子女心理輔導
陳豪今日離港公幹起碼兩個月，臨行前卻忙到連行李也沒時間收拾，要太太代勞。面對隔離日子，他大叫可乘機放鬆，唯獨不捨得一家大細，早已做足「心理輔導」。
陳豪、宣萱、羅子溢及滕麗名等，昨午為劇集《陀槍師姐2021》結局篇宣傳。宣萱被安排與阿滕及陳庭欣「拗手瓜」，戲中愛貓「湯圓」亦有現身，場面熱鬧。隨着最後5集播出，意味前後共5輯的《陀槍師姐》系列告一段落，角色貫穿5輯的阿滕感觸說：「唔知幾時先再開嘞，再開希望換吓角色啦！」
阿滕少見關詠荷
談到《陀》系列帶來最大的得着，她直言：「陳三元（角色名字）嘅性格本來同我本身唔似，依家都改變咗我。依家仲有人叫我3蚊雞，我同拍檔歐陽震華都有保持聯絡，關詠荷就少啲嘞。」
陳豪今日將出發往深圳，為《白色強人II》拍攝外景。昨宣傳活動後他仍要通宵趕戲，要太太陳茵媺代勞執行李。他坦言很早已與仔女「心理輔導」，講明爸爸將要離家一段時間：「嚟緊嘅隔離生活，其實好多嘢要處理，又要健吓身咁，放鬆吓囉。」至於其咖啡店位處爆疫商場，目前已停業，陳豪認為最緊要安全至上。
未試過翻撻舊愛
另外，以一襲貼身短裙現身的陳庭欣，談到劇內她出盡陰招，與宣萱爭陳豪，她笑說：「有啲觀眾睇網上版追晒，覺得我個角色好乞人憎，開始畀人鬧嘞。我好變態，依家出街如果有人鬧，我會仲開心呀。（現實中有冇試過翻撻前度？）我每段感情分手都會搞得好清楚，分手後唔會再聯絡。（介意男友同前度約會？）如果普通聯絡冇所謂，單獨食飯就唔係咁好囉。」