何嘉莉收起戰鬥格 江伊晴享受唱Live
歌手何嘉莉（Lillian）去年應監製伍仲衡（Harry）邀請開Live唱歌，造就重返樂壇的決定，並答應參與Harry於3月底舉行的2場騷，演出的還有江伊晴（Elanne）、黎瑞恩、石詠莉、湯寶如等20多位歌手。外間以為今次是Harry的作品展，他解釋是將網上直播變成實體音樂會：「希望畀一個集體回憶大家，我哋會由80、90年代唱到2000年。」
熱愛唱歌的Lillian，自言以前是作戰狀態，如今心態有變：「係時候把握曾經擺低咗嘅夢想。」又笑言與Elanne屬不同年代：「我哋出道差7年，嗰時啲活動或頒獎禮粒粒巨星，張國榮、梅姐（梅艷芳）全部仲健在，依家就係新世代，成個樂壇嘅運作模式改變晒。」
Elanne亦認同現時心態有變：「以前唱歌拍戲係事業，可能為攞獎，每次上台都好驚走音，依家好享受唱歌樂趣。」問會否搵埋老公Oscar做嘉賓？她說：「唔會，佢唔可以喺鏡頭或好多人面前唱歌，會發台瘟走音、唔記得歌詞甚至僵硬，佢好快就知自己唔適合表演，所以做咗幾年咪消失咗囉！」
調理身體等生仔
其實Oscar也有唱歌癮，但只限於屋企及座駕，她說：「我作為佢嘅小粉絲，亦係唯一嘅聽眾。」並表示婚後「慢活」做大食懶，又開始服中藥調理身體，隨時準備造人。