張振朗愛挑戰 搵自己較飛

張振朗、朱敏瀚早前於台慶頒獎禮分別奪得「最受歡迎電視男角色」及「飛躍進步男藝員」獎項，成績有目共睹，兩人繼續沉醉演戲，振朗坦言想挑戰「大肥佬」角色，說到增肥後要速減很辛苦，他說：「唔會喎！我真係好鍾意演戲，入行一開始到依家冇變過，我都幾鍾意搵自己嚟搞，好似之前想達到大隻嘅目標，每日食1kg雞柳，大約22、23條，真係好難食！我唔易肥，真係要食到嘔先增到磅，辛苦嘅！」他又指拍《拳王》遇到黎耀祥有很多得着：「祥哥對演戲渴求同研究，真係令我好驚訝同佩服，好彩畀我遇到佢，簡直為我未來上咗一堂預備班。」

朱敏瀚亦愈來愈享受做戲，笑言剛拍完《拳王》休息已感浪費時間，想找點興趣增值。之前演《反黑路人甲》陸秋一角令觀眾看到他成長，他說：「觀眾緣真係要儲，之前入咗《都市閒情》做主持，初頭入去有啲意外，但我好記得安德尊同我講，要珍惜呢個地方，一定帶到嘢走，初頭我唔鍾意都有啲徬徨，係咪2年後可以走到呢？當時我同監製講，希望我唔會喺度好耐，好似有啲寸寸哋，但監製好好，都有放番我出去拍劇。」

與女友愛得大方

至於謝東閔去年都有多套劇集播出，包括《堅離地愛堅離地》、《殺手》、《香港愛情故事》等，更唱了不少劇集歌，反應相當不俗，他坦言：「都好開心，同戴祖儀合唱嗰首歌點擊都過200萬，幾唔容易。（有冇撻着想專心做歌手？）咁又冇呢個諗法喎！有得唱當然會唱，我想繼續做好啲戲，自己會擺多啲時間落去，依家拍緊《黯夜守護者》同展鵬有唔少對手戲，之前拍《大藥坊》佢教我好多嘢。」

3位小生都有一個共通點，就是有位圈中女友，大家都愛得大方，張振朗與楊偲泳同樣喜歡演戲，問公司有冇給壓力？他說：「冇！依家呢個世代拍拖咪拍拖囉！依家大大方方認咗佢仲好，最緊要大家舒服。」而謝東閔與朱智賢似乎有經歷後愛得更深，他說：「就算冇公開我都唔會專登避忌，但都唔想觀眾專注我私生活，想佢哋專注我工作表現上。」朱敏瀚則坦言與女友余思霆都是在日本旅行時被影到才公開戀情：「呢啲嘢唔會自己專登公開，影到咪順其自然囉！」