龔嘉欣遲婚着數 預習做賢妻
龔嘉欣愈做愈旺，牛年檔期已排到年底，笑言感覺有點不真實。萬事俱備，獨欠愛情，她表示會繼續等待，「少婦聯盟」中最遲嫁的她更指自己是當中最幸運的一位。
無綫藝人龔嘉欣於台慶頒獎禮中奪得「馬來西亞視后」及「最受歡迎電視女角色」兩大獎項，牛年繼續大豐收，現時她手頭上已接了4套劇集之多，工作排到年底。現年31歲的她，有生意、有樓、有事業，可謂相當圓滿，不過說到愛情，她表示仍在等待中，身邊好姊妹陳凱琳及譚凱琪已為人妻人母，她說：「我反而係最幸運嘅一個，可以吸收晒佢哋做好媽媽、好老婆嘅心得。」
唔敢諗閃婚
談到牛年展望，她坦言會向香港區視后進發，問到失落港區視后是否失望？她說：「絕對冇！呢個結果已經好好，我個人好知足，唔係樣樣都會畀你得到o架嘛！（仲想擁有啲乜？）由細到大我唔會追求好多嘢，唯一要講係未有一個家庭，但仲有時間，我只係31歲，依家成績咁好，想好好把握。（今年又唔拍拖？）我唔敢講實呀！（會唔會閃婚？）我唔敢諗呀！好多結咗婚嘅人同我講結婚都係嗰一吓衝動，未到嗰陣我唔知呀！」
每次說到搵男友，她都表示娛樂圈找另一半很困難，但「少婦聯盟」的好姊妹均遇到好歸宿，她說：「係啦！點解嘅？（你要求高？）唔係！可能我冇時間，只能夠等待，要搵一個能夠體諒我工作嘅人唔容易！（『少婦聯盟』逐你出會？）我地位不知幾穩固，每次見面佢哋都會爭住畀個BB我抱。（羨慕？）唔係羨慕，係戥佢哋開心，依家我會向佢哋預早學定點樣做一個好老婆、好媽媽，真係唔係一件容易嘅事，太耐自己一個人，好多嘢會忽略咗。」