戴祖儀恨拍拖 怨鄭衍峰辦事不力
藝人戴祖儀、林穎彤、曾淑雅（Jumbo）及鄭衍峰合作拍攝無綫節目《港產旅行團》成好友，被「三娘教子」的阿峰踢爆祖儀恨拍拖：「唔知邊個成日問我有冇好介紹呢？」祖儀及林穎彤聞言噓爆阿峰「得個講字」，他則反擊：「依家禁聚令呀，點約呀？」兩位靚女即反駁：「你介紹完可以走先。」
談到牛年桃花運，祖儀說：「相士話我嚟緊會有拖拍，對方有才仲好照顧我，不過話明唔係靚仔。」Jumbo則安慰她：「唔緊要，識咗你之後會愈嚟愈有夫妻相，咁咪變靚仔囉。」林穎彤早前於《勁歌》獲獎，但她直言比較喜歡拍劇。至於外表醒目的Jumbo被幾位拍檔踢爆「轉數慢」，經常被整蠱。