陳欣茵扮專家 教游嘉欣破Dry
無綫節目《#後生仔傾吓偈》盛產潛質新血，當中兩位「後生女」於鼠年名利雙收，牛年誓要將旺氣延續。游嘉欣透露今年主力拍劇，亦暫不打算搣甩「屋邨妹」稱號：「年年都要努力賺錢，但暫時唔會想擺脫公屋，住咗咁多年都有感情，加上配套設施實在太好，寧願裝修整靚間屋。」陳欣茵則繼續向主持方向進發：「上次《學是學非》我淨係參與最後幾集，學習同體驗嘅比較少，期待新一季快啲拍，由上年尾等到依家啦！」
2人不只發展方向、性格截然不同，就連拍拖經驗也相反。從未拍過拖的游嘉欣直言望感情盡快有着落，令旁邊桃花運勁旺的陳欣茵聽到後，即化身戀愛專家教路，應降低擇偶條件，不要經常做「宅女」。