ANSONBEAN重返校園
現年20歲的陳毅燊（ANSONBEAN），在《全民造星Ⅲ》人氣由頭帶到尾，雖然最終屈居第3，但已十分滿足，不枉他停學參賽！就讀科大工商管理學系Year 2的他，選擇讀Business是覺得這科能套用在任何事情上：「我對做生意有興趣，但未知做乜，書本學到拆解市場諗緊乜，覺得好有趣，但讀咗之後又唔係我想像咁容易，唔係想像咁好玩，哈哈！」
初中就讀名校聖士提反中學的他，高中期間有2年往英國留學，之後返港考公開試，考獲好成績：「為咗返香港，我逼自己讀書。（點解逼自己返嚟？）因為我想表演，香港多啲機會。」
唔心急追學分
其母經營跳舞學校，他謙稱媽咪和弟弟跳舞比他好，母子感情極佳，但他自爆為了參賽，曾與媽咪駁火：「大家觀念同重視嘅嘢唔同，就駁咗佢嘴！佢覺得我唔應該停學參賽，但我覺得值得花時間，可以擺低讀書一陣。不過拗拗吓佢放棄咗，最後佢話好啦，上年9月至12月就停學。（失咗嘅學分點追？）唔趕，不過都要讀番。（遲過其他同學？）唔需要同人比，大家開心就得。（準備好重返校園？）要識番啲讀書朋友，上年識嘅朋友可以幫吓手，畀啲資訊我。」
問到即將重返校園，可擔心同學對他態度有變？他說：「比賽時少咗見，依家見多咗，冇乜分別，佢哋主要問我之後點同恭喜我。（對你心心眼？）唔會，因為熟嘛，淨係話『正呀』！」會否到媽咪的學校教舞？他說：「可以教人，但覺得功力未夠精湛，未做到一個老師，可以教到細節，但唔想教錯，影響跳舞文化。」