楊卓娜遭妹夫羅子溢「警告」 唔好玩咁埋

藝人楊卓娜昨日到新城受訪，講到楊茜堯的囡囡「小珍珠」現時9個月大，問到平時可有與妹妹交流湊B心得？她指妹妹兩公婆現時在內地拍劇，更大爆妹夫十分緊張：「依家由阿媽湊『小珍珠』，我埋去都唔畀！前日去探佢哋，羅子溢即刻喺電話同我講『戴番口罩，唔好同我個女玩咁埋』，搞到我好大壓力，只可以影狗咁離遠影BB，但我都明嘅，依家疫情關係。（妹妹冇咁緊張？）兩個都有提我。」

她續指「小珍珠」目前只能在屋苑範圍活動：「每日都有曬太陽，我個女有同佢喺屋企爬吓玩吓，但覺得依家啲小朋友好慘，就算1歲都好似冇見過世界咁！」她又謂希望妹妹兩公婆可以趕及在農曆新年前回港，問到他們可有掛到個女喊？她說：「唔知呀，實有嘅，始終離開咁耐，但佢哋兩公婆可以攬埋一齊喊，哈哈。」

讚女兒夠獨立

講到在節目中分享人生體驗等，問到她怎樣設計自己的人生？她笑說：「冇計劃就係最好嘅計劃，所有嘢活在當下。」她也沒有為囡囡作特別安排：「佢嘅人生係屬於佢，我會陪伴佢成長頭嗰20年，會培育佢學唔同嘅嘢，發掘唔同興趣，但之後就交番畀佢選擇。」她指11歲的囡囡現時正值青春期，但沒有反叛，反而很獨立、思想清晰。另外，講到電台鄰近封區檢測的紅磡，她表示不太擔心：「生死有命，做好自己就得。」