宣萱雄心壯「質」儲夠50次

陳豪、宣萱、滕麗名、洪永城等昨日出席無綫劇集《陀槍師姐2021》宣傳，期間分組玩連步舞遊戲，當中洪永城孭住鄧佩儀搶Fo，但搞到面紅耳赤，場面搞笑。

陳豪讚太太好叻

宣萱對於今輯繼續做人質，被網民取笑為「御用人質」，連她也忍不住自嘲：「我都唔記得做咗26、27次人質，今次都係邊拍邊寫劇本，呢個被綁架紀錄保持者都幾特別。（想唔想入世界紀錄？）等過多20年，我做夠50次先啦，不過拍被挾持戲都幾開心。」

最近搬了新居的陳豪，笑指只是搬到隔籬座：「搬大咗！太太搞掂晒，佢真係好叻，除咗湊小朋友，亦打理間屋。（再生小朋友？）都夠啦，見好就收，有意外先再算，唔好絕我後路。（有指你逆市賺過千萬？）最緊要大家開心。」

滕麗名舊情冇尷尬

而阿滕當年因拍攝《陀槍》系列而與魏駿傑撻着，日前劇集播出回憶片段，問到可感尷尬？她說：「拍嗰時係睇唔到呢啲畫面，播出我仲未睇番，冇問題嘅，每個人都有過去。（但呢場獨腳戲，網民讚你做得好好！）本來一Take，但導演想我再靚啲，要喊得收斂少少。」