宋熙年撒嬌 生多個冇碇企
陳智燊與宋熙年現時夫妻檔經營網上頻道，原來恩愛背後，他們常為工作及家事吵架，幸好大家都容易放下。提到目前育有兩子，宋熙年即向老公「投訴」，指自己在家地位不保，若生多個女就更加要靠邊站！不過被問會否再生，她卻未有落閘。
陳智燊（Jason）及宋熙年（Sarah）是圈中模範夫婦，二人離開無綫後，轉型KOL經營網上頻道，不時拍片分享生活日常。Jason指網上平台有很大空間及自由度，Sarah就透露剛開始時曾遇困難，做慣主持的她好易就會正經腔，故要調節。講到有指他們目前收入最高峰可月賺60萬，Jason即笑說：「如果係真嘅話都幾好，可以做半年工作就休息。（最高峰賺幾多？）好難咁計，因為廣告係年計，但都開心嘅，多謝客戶咁錫我哋，啱啱都有個網購平台搵我哋合作。」
性格善忘 鬧交轉頭唔記得
兩公婆日對夜對，連工作都一齊，拗撬可會變多？Sarah笑言他倆經常吵架：「其實唔可以話嗌交，係大家有各自諗法、發表意見，但好嘅係我哋好容易擺番低。（嗌交係為工作定係家庭？）都有啲，因為我哋對每個環節都好緊張。（邊個主動氹番對方？）通常都係佢，同埋我有個缺點，就係好容易唔記得咗啲嘢。」
二人育有兩子，Sarah沒好氣地說家中有三個「陳生」激她！至於可會想生個女抗衡三男？她笑說：「我啱啱生咗幾個月，依家仲係經歷緊最辛苦嘅湊仔階段，所以唔好問我住。」Jason就說：「依家湊兩個小朋友，要好畀心機用好多時間同佢哋玩同教，所以要認真考慮吓先。」Sarah又說：「唔想生多個會忽略任何一個，所以順其自然啦！同埋如果第三個又係仔咁點？係咪要生四個？」她又乘機扮喊向老公詐型：「依家有兩個仔，我已經地位不保，唔好講女，我真係可以企埋一邊o架啦！」