陳煒叛逆家人 顧住瘟仔

陳煒與陳展鵬昨日在北角一間茶餐廳拍外景，劇情交代她的14歲兒子正值反叛期，母子爭吵，更出手摑仔，結果兒子離家出走，獲展鵬收留過夜。

陳煒周圍搵仔，愁容滿面，她受訪時笑說：「真係好愁！今次有好多情感戲，後尾有和解，成個轉變歷程幾感動，真係對愈親嘅人就愈有脾氣！」問到小時候做過最反叛的事？自認乖乖女的她，笑言最曳只是掛住拍拖，當家人說話「耳邊風」，問到是否拍拖就「失蹤」？她怕醜說：「唔記得啦，哈哈！」展鵬則表示會跟父母唱反調，無視勸告飲汽水及食糖，結果喪咳。

忙到冇時間買紅底

新劇拍攝橫跨農曆新年，陳煒未知會否去男友家拜年，自言目前最想抽時間買條紅底，又說：「新年會買新內衣褲，但今年真係冇乜時間準備，拍劇都拍到年三十晚，往年會下廚。」展鵬則冧爆表示已教囡囡「小豬比」講新年賀詞及做拜年手勢：「上年唔係咁識，呢幾日有教佢講『恭喜發財、身體健康』，但講唔正。不過今年疫情關係未必拜年，下年就補番2年嘅利是！」他又冧爆「甜蜜的煩厭」，指囡囡現時是「管家婆」，經常指揮他和老婆單文柔清潔家居，同時又爭住做小幫手。

陳敏之助攻催婚

另外，陳煒日前趁拍攝空檔為「1月星辰」展鵬及陳敏之驚嚇慶生，敏之在社交網上載照片答謝，同時向對方的醫生男友陳國強催婚：「誰能娶到煒哥，一定會幸福到暈。謝謝你的Surprise，好開心喔！」