林作玩大咗 林母：係真就斷絕關係！
前港姐麥明詩舊愛林作被爆在踏入除夕一刻簽字結婚，可是林媽媽再以斷絕母子關係作脅，堅決不接受「失婚裕美」這個「新抱」，林作連忙否認婚訊，直認「造假」！
林作跟裕美相戀兩年多，雖然林母一直表明不喜歡失婚的裕美，大力反對這段戀情，但林作依然與女友打得火熱，早就發展到同居階段。昨日突傳兩人踏正凌晨12時簽字結婚，林作穿黑色西裝，裕美就揀了掛頸開胸婚紗裙，更肉緊咀嘴！有指林作瞞住母親，離奇地在美國猶他州的網上系統登記註冊，透過視像由海外律師主持儀式，裕美母親則到場見證。
畀同事擺上枱
身在內地的林母否認兒子秘婚：「佢哋都係玩吓，唔係真。」並再次威脅說：「如果佢真係瞞婚，我會同林作斷絕母子關係，哈哈！」一對「新人」亦連忙否認，林作說：「唔係結呀，冇結呀！我同保險團隊呢幾日開Party，諗住玩吓嘢，點知畀個同事玩咗我先呀！做到好似好真咁，玩大咗，咪當造吓新聞笑吓。（真係冇結？話你搵海外律師喎？）結婚邊有得咁兒戲，傻傻哋，睇到啲相都知開緊Party玩緊嘢，講到咩律師見證，邊有得咁樣o架？（有冇諗幾時結？）冇時間表。」裕美亦笑說：「真係唔係真o架，搞到個個走嚟恭喜我，好搞笑。（林作好錫你？）佢錫我係真嘅，將來真係結婚會話你知。」