蘇頌輝禮儀專家教談判
主持人蘇頌輝擔任明珠台節目《港生活．港享受》主持逾10年，既是活動主持人，更是知名的商務禮儀專家，10多年來為多間本港及內地企業教授改善溝通及談判技巧，以提升個人及企業形象。他笑說：「之前有部日本電影《禮儀師之奏鳴曲》，有人誤會過我係做殯儀行業，我唔會好介意，只係覺得好好笑。」
諗過收養小朋友
他舉出大家常犯的「失禮」之處，就是忽略自我介紹及打招呼：「例如我做活動主持，有公關走嚟同我講一堆嘢，完全冇介紹自己個名，我想搵番佢都唔知點搵。第二，打招呼，其實問人哋：『你食咗飯未？』係令對方舒服覺得受重視，大部分人習慣唔打招呼並非無禮，而係缺乏自信。」
上個月女兒Ayla的降臨，更令他多了父親這個身份，他說：「我好喜歡小朋友，但冇諗過會生兒育女，因為以前冇一個女友諗住生B，而我之前單身咗3年幾，搵唔到適合嘅另一半，諗過不如收養小朋友，將所有嘅愛畀佢。直至遇上太太，佢一直想做媽媽，所以我同自己講遇到咁好嘅女仔，佢又想生小朋友，我應該要好好珍惜。」他大讚太太性格有耐性又禮讓，令過往大男人的他亦學懂遷就。