「男神」張智霖（Chilam）平安夜現身順德出席商演活動，西裝骨骨的他坐在紅色開篷古董車後座型爆登場，全程有50名保安化身人肉護欄「護駕」，過百名粉絲甫見偶像即尖叫，場面熱鬧。Chilam進場後，粉絲即一擁而上，秒速前後「包抄」，希望零距離親近偶像，惟被保安阻擋，搞到現場水洩不通，男神魅力果然沒法擋！
有幸埋身的粉絲於社交平台晒「戰績」，見未有戴上口罩的Chilam狀態非常好，難怪迷倒萬千少女！不少網民讚他凍齡有術，甚至形容他為巨星下凡：「這也太誇張了，張智霖的顏值還是一如既往的帥氣」、「沒想到張智霖真人這麼帥，看起來最多30歲，不能再多了」、「他是吃了保鮮劑嗎？比我這80後的大叔都年輕多了」，幾乎所有留言有讚冇彈！
Chilam昨日受訪時表示現往杭州工作，連日來化身「空中飛人」穿梭各地搵真銀：「依家係喺飛機上面，今朝先喺上海返深圳。嗰日喺順德參加一個亮燈節活動，可能係我今年首個商業活動，所以有好多粉絲嚟。」提到他坐開篷古董車時獲半百保安護送，他指可能因古董車太名貴，故需要如此多保安維持秩序，又笑說平時出活動都不是如此「大陣仗」。
問到疫情期間被過百名粉絲包圍，可會擔心距離太近？他坦言不擔心：「都有適當嘅距離，加上大會喺防疫措施方面做得好好。」