張敬軒租銅鑼灣舖王開3層婚紗店
英皇歌手張敬軒繼投資錄音室、開餐廳及餅店後，昨日宣布進軍時裝界，疫情下於銅鑼灣樓高3層的「舖王」開婚紗禮服概念店，認真瓣數多！
張敬軒以百年時裝品牌的歷史顧問身份打理婚紗店，至於曾跟胡杏兒合作婚紗店的設計師姚子裕（Kev）則擔任首席創意及設計總監，另外還有2名拍檔合作，軒仔說：「今次我係有力出力，主要係Kev佢哋搞，我負責資料同埋寫品牌故事。因為呢個品牌歷史悠久，佢哋有過百年嘅歷史，又經歷戰火洗禮，我希望帶出文化價值，畀消費者關注到歷史價值，有時呢啲嘢比錢、商業元素重要。」
多謝老闆支持
投資少少的他謙稱舖位有賴老闆楊受成支持：「咁有意義嘅事，我膽粗粗同老闆講，佢好支持，畀咗個靚位舖王我。講真，如果唔係老闆咁支持我，都唔會搞咁多嘢，因為佢成日教我哋花無百日紅，要積谷防饑，要我哋儲錢，所以一有生意機會，佢都好鼓勵我哋去嘗試。當然佢同我約法三章，唔可以太影響唱歌。」
其實軒仔加入團隊背後有段古，一向鍾情歷史建築研究、關注文化保育的他，自從居於二級歷史建築Alberose後，開始研究威爾家族的歷史。他除對大宅作出保育及修繕工作外，更曾遠赴巴黎、倫敦等地為該家族歷史作資料蒐集，因而認識威爾家族第3代後人Molly O'dell，從中了解過百年時裝品牌。
而Kev表示與軒仔相識逾10年，今次合作更添默契，指對方主力求證品牌發生的故事，然後交由他設計︰「同我以往工作好唔同，因為以往係做個人品牌，依家更有使命感，就好似有一個劇本由我去演繹。」