20年姊妹情 阿嬌自揭怒摑阿Sa
阿嬌在圈中發展近20載，雖然人生、愛情都經歷過巨變，慶幸姊妹情從未變。除了有Twins好拍檔蔡卓妍（阿Sa），又有並稱「龍虎豹」的容祖兒及經理人霍汶希（Mani）愛錫，早前她半夜受傷，祖兒與Mani二話不說即飛往陪伴，令她大為感動。
明年是Twins出道20周年，想到與阿Sa並肩作戰多年，她坦言亦不無風浪：「我哋冇鬧過交，但試過冷戰，為咗工作有唔同意見。（傳過不和、猜度對方？）一定有呢啲時間，但過咗就冇事，一定要相信對方，冇咗大家唔得。」兩人可說是比情侶更深愛着對方，阿嬌坦言：「佢好似男朋友咁，試過有次喺口岸過關，佢喺廁所門口送上親手做嘅生日蛋糕。我好相信佢，成個人交託畀佢，好肉麻，但佢好照顧我o架！」最近她們相隔多年再合作拍劇集《女法醫JD》，阿嬌預告會演反派：「我哋係敵人，相愛相殺，仲要摑佢同摸佢身體，我個角色有好多面。」