倪晨曦餵母乳辛苦谷奶嗌痛
倪晨曦產後1個月，昨日首度復工拍廣告，穿上西裝的她看似未完全收身，期間獲送上蛋糕祝賀其囝囝滿月。講到坐完月就復工，她笑言驚有水腫：「我都肥咗唔少，我生咗之後輕咗6公斤，但仲要減多8公斤先去番之前咁。」
她又笑言坐月頭1個星期辛苦：「我同老公本身仲諗得好輕鬆，諗住淨係叫陪月日頭過嚟，點知我一出院嗰日冇瞓到，已經好辛苦，所以我哋就叫個陪月轉做24小時，我即刻好似去咗天堂咁。」她又謂現時餵母乳有些辛苦，谷奶都會痛，但老公在旁幫手已是最好禮物：「佢比我想像中親力親為好多，佢由我生一路陪住，又幫BB沖涼、餵奶、掃風。」她亦透露現時出去工作會掛住BB，由於疫情嚴重，不會為囝囝舉行百日宴。