露雲娜冧唱老公Forever譜三世情緣
靚聲天后露雲娜籌備2年推出的Hi-Fi新碟《下雨天》大賣，更深受發燒碟愛好者愛戴，帶挈她升級成為「Hi-Fi女王」！她坦言相當榮幸，打算開演唱會答謝樂迷支持：「本來今年3月趁公司55周年開演唱會，最後搞唔成，希望明年開到，最好到時大家可以除口罩，少啲隔膜。」
講到新碟籌備多時，從1,000首歌曲中精選10首最愛的作品翻唱，她最難忘的卻是由老公Perry Martin親自作曲填詞的新歌《Forever》，她說：「佢覺得前世同過我一齊，今生搵番大家，來世都想繼續做夫妻，永遠認定做彼此嘅伴侶，所以歌名叫《Forever》，真係好感動。嗰陣佢話有驚喜畀我，我睇到份詞即刻喊咗出嚟，原來佢由2014年已經開始寫，可以話記錄住我哋嘅婚姻。」她續指老公向來浪漫，不時寫紙仔炮製小驚喜，而她則下廚「回禮」。
提到結婚7年，她笑說：「我哋到依家都係新婚期，完全冇7年之癢，反而會覺得『原來7年咋？』，因為太熟，好似識咗好耐咁，大家性格好夾、好有默契，例如錄歌嗰陣，我哋隔住錄音室咁遠，都好似有心靈感應，Feel到佢諗緊咩，平時都係，佢未開口，我已經接到佢講嘅嘢。」
爆陳百強爽身粉扮咪
此外，她在新碟分別翻唱好友陳百強及林憶蓮的歌曲，她表示難忘當年相處時光：「Danny（陳百強）首個演唱會就係搵我做嘉賓，嗰陣一齊跳Sexy嘅Disco舞，喺屋企練嗰陣佢揸爽身粉、我拎把梳扮咪，好搞笑！同憶蓮就成日出嚟飲嘢，喺蘭桂坊傾到凌晨，真係好開心。」