無綫擴展黃金時段「再見2020」

新冠肺炎疫情重挫各行各業，無綫與全港市民一起以愛與關懷，攜手跨越2020年每個難關，發放正能量。無綫將於下周一（12月7日）起在翡翠台黃金時段推出多個全新節目及劇集，當中包括《香港愛情故事》、《再見2020你還好嗎》、《衝上雲霄大選》、《2020大事回顧》、《非凡三俠》及《逆境前行 我要繼續做老闆》，實行與廣大觀眾一起「再見2020」，共同迎接新一年、新開始！

無綫昨日特別舉行「再見2020」記者會，參與6大節目的藝人龔嘉欣、羅天宇、王敏奕、謝東閔、龔慈恩、洪永城、鄭衍峰及李旻芳等齊集，介紹節目內容，而電視廣播有限公司副總經理（節目及製作）杜之克、助理總經理（非戲劇製作）余詠珊則聯同節目代表主持啟動儀式，場面熱鬧。杜之克表示今年對各人而言都非常難捱，現時終於捱到年底，故花了一星期敲定這個項目。

王敏奕	謝東閔	謝東閔的造型要黐鬚，王敏奕咀到成面毛！

親近型男有艷福

《香港愛情故事》負責打頭陣，一班主角落力宣傳，大談拍攝難忘事。王敏奕劇中與謝東閔、黃嘉樂及黃子恆等有感情線，她笑言與謝東閔的親熱戲印象最深刻，因為對方要黐假鬚，拍攝時頻頻爆笑料：「大家一路Kiss好投入，但Feel到啲假鬚黐晒落我塊面度，好拮，所以每個Take拍完都要補妝，同埋Kiss有啲尷尬。（做咗人妻都尷尬？）大庭廣眾面前，仲要角色咁奔放，Kiss到咁激！（敢唔敢叫老公曾國祥睇？）佢唔喺香港，唔知睇唔睇到，但佢有睇預告，第2條預告激啲，唔知佢有冇睇。（冇備案？）冇乜，我係專業演員，希望得到佢嘅垂青，佢係導演應該明白。（劇入面同幾個型男親熱，好有艷福！）多謝導演覺得我有呢個能力。」至於謝東閔被問到會否叫女友朱智賢捧場，他說：「我唔知佢睇咗個預告未，亦冇問。下星期我要開工，自己都要睇情況睇唔睇到。」

龔嘉欣希望開新戲路吸引觀眾。

劇中嘉欣與羅天宇住太空艙，想親熱都諸多限制。

龔嘉欣「領軍出征」

對於《香》劇被視為與友台選秀節目打對台，劇中頻頻床戰羅天宇的龔嘉欣說：「我覺得拍完嘅作品咁快出街係開心事。（有冇壓力？）對我嚟講唔覺得係『打仗』，反而覺得劇集題材新鮮，希望可以吸引到更多觀眾鍾意呢類戲種。套劇我有超過一半係床戲，可以同香港先生冠軍拍床戲，好有艷福。不過拍親熱戲時環境好擠迫，好熱好焗，搞到成身黐立立，唔係幾舒服，好尷尬！」至於劇集監製林肯坦言對作品有信心：「套劇反映時下香港人要搵地方親密相處，同埋拍12集都係新嘗試，當然一定有壓力。」

《香港愛情故事》

播映時間：12月7日起晚上10時30分