歌曲《原始心態》是吳業坤加盟新唱片公司之後的首支派台歌，表達身邊種種誘惑，都希望能夠保持初心走下去。對於吳業坤來說，初心就只是「想唱歌」如此簡單︰「參加歌唱比賽到依家10年，我覺得係冇枉過，講得出唱歌係自己嘅專長。」
重提有網民指新歌抄襲布志綸的《森林》，吳業坤堅決否認，並無奈說︰「真係好戥成個團隊唔抵，如果你真係識音樂，分析番背後嘅旋律，一定唔係抄歌囉！可以叫啲音樂人、博士寫篇論文講冇抄，但係咪要去到咁先？不如用啲時間再造首新歌，依家呢個世界，覺得大家需要去進步，而唔係全部信晒一個風氣，要識得去分析。」