楊明「分身家」10萬獎金冇得剩
楊明在台慶夜抽到10萬元獎金，他笑言已將錢分出去，女友莊思明及父母都有份。對於有報道指他笑容滿面、懶理官司，他反問：「唔通每日都要愁眉苦面對住人？」
楊明昨日偕王君馨、黃嘉樂在石硤尾為劇集《我家無難事》取景，談及在台慶抽獎奪得10萬元，他透露已將錢分作5份，分別給媽咪、爸爸、女友莊思明、自己及用來做善事。對於陳百祥笑他攞番個尾彩，他笑說：「嗰晚我入化妝間補妝，聽到有人叫我個名，以為有人喺度玩，後來先知係1廠叫，即刻乜都唔理衝出去，不過我自己嗰份已經用晒！（用嚟『萬歲』請工作人員食嘢？）係呀！佢哋好辛苦，大家開心吓囉！」
其交通意外官司將於下月11日再審，昨日有報道指他拍攝時笑容滿面，懶理官司，又指他無意戒酒，對此他澄清：「嗰份報章話我開工有笑容就係懶理，其實我喺呢行咁多年，經歷過咁多高高低低，唔通每日都要愁眉苦面對住人？（話你覺得唔使戒酒？）我唔係咁嘅意思，只係話酒唔係唔飲，而係喺安全情況下飲，不過我都慣晒，佢哋只係想影響我嘅Image同單官司啫！我會平常心。」
黃嘉樂搶做「老飛」
至於嘉樂近年備受重用，角色多元化之餘，戲份亦不少。去年台慶頒獎禮，他憑《解決師》中的「小鳳」角逐「最佳男配角」，今年在《大醬園》飾演的「萬卓楠」亦相當出色，問有否信心攞獎，他說：「我都好鍾意個角色，不過今年對手應該好強勁，有提名已經開心。」他坦言入行20年，只提名過一次「男配角」，之前都是提名「飛躍進步男藝員」，在旁的楊明笑說：「我大前年都係提名飛躍獎，我已經係『老飛』！」嘉樂即說：「咁我要提名多次，我要取代你嘅『老飛』地位！」
而早前腳部韌帶撕裂的王君馨，至今還未完全痊愈，但仍忍痛拍畢第2個MV，她說：「有同排舞老師度舞步，盡量挨住啲櫈同床邊跳，呢首係浪漫嘅歌，希望聖誕前推出。」