張敬軒冇得握Fans手 出招「拉」近距離
英皇歌手張敬軒前晚於紅館騷頭場興奮自爆獲老闆楊受成「課金」，創立自家唱片品牌！雖然取消握手環節，但無礙軒仔親親Fans，計仔多多的他自備拉尺以量度安全社交距離，還繞場一周，Fans相當受落。
連續8場的《張敬軒 X 香港中樂團盛樂演唱會》正於紅館熱烈開唱，前晚首場軒仔換上多套特別造型登場，Encore環節時更抵死地將連日來在社交網晒家傭所煮的「攞命」早餐圖像貼上身，成功逗Fans發笑！唱得興起之際，他突然宣布喜訊：「唔係結婚唔使驚！加入公司7年時間，公司上下、老闆同高層都好支持我，喺楊博士（楊受成）支持下，我今年成立自己嘅唱片品牌，希望大家支持新Label發行嘅唱片！」更忍不住High爆高呼「Yes」，全場即以熱烈掌聲祝賀。
疫情下失3位家庭成員
除了是疫情期間首位重踏紅館開騷的歌手外，軒仔又自嘲是史上第1位紅館開騷帶拉尺的歌手！因受疫情影響要取消握手環節，但創意十足的軒仔特別準備驚喜，自備拉尺拉出安全社交距離繞場一周親近Fans：「千祈唔好掂我把尺，行過嚟畀你哋『瞻仰吓』﹗」Fans相當受落，一擁而上「瞻仰」偶像。
演唱會亦有深情部分，軒仔剖白指於過去1年經歷不少挫折，包括因疫情未能回廣州探望父母，又接連失去3位家庭成員，愛犬最近更被診斷患上漸凍症︰「佢嘅行動會一步一步流失，直至食唔到嘢。」感慨人生有煎熬時，但要學識於生活中尋找小確幸，又爆老闆每朝Send「長輩圖」給他：「眼屎都未抹乾淨，就見到有人關心自己，我會繼續分享更多愛……忍受啲早餐！」
獻唱《笑忘書》前，軒仔形容這首歌有千斤重：「相信大家入嚟嘅心情同我一樣恍如隔世，本來睇演唱會係理所當然嘅事，但都變得咁艱難，無論生活有幾苦，有張敬軒嘅音樂陪伴大家，係我嘅福氣！」