「外賣老婆」成功三年抱兩，不過佢佗B都懶係國家機密咁，畀記者踢爆佗第2胎之後，發悔氣兼鬧爆個報道係捏造，但過多兩日竟然自己宣布佗B，呢個「跳掣」行為完全同美貌與智慧並重扯唔上任何關係！
佢仲要次次發錢寒出活動見記者都扯開BB話題唔講，但其實又好想接受訪問嚟增加曝光率，真係世界上最矛盾嘅大牌藝人！可能佢都知自己喺記者心目中形象插水，用心設計咗個扮好人嘅「劇本」，近呢幾次出席活動都照辦煮碗咁演，先叫公關同記者講唔會接受訪問，之後就同「大舊」經理人一齊擺公關上枱，話係公關冇安排訪問環節，當眾落公關面，最後就梗係扮晒好人笑到四萬咁口歡迎記者提問啦，呢啲招數用1次就話Work啫，但佢次次都係咁，成班記者即場反晒白眼，唔怪得啲人話生完B記性係會差好多，真係要頒番個「最佳女主角」畀佢！
