大陸嘉緹想爬松岡頭做一姐
日模松岡李那師妹、現年27歲的模特兒大陸嘉緹（Kat），樣子甜美、身材惹火，她和松岡早在日本相識，分屬好姊妹，不過Kat坦言公私分明，工作上，她希望做到第一！
大陸嘉緹是Kat的日本名字，但其實她的父母是美國人，她並沒有日本血統，因為在日本做了5年模特兒，對當地情有獨鍾才改了日本名。今年她加盟王友良旗下，做松岡李那師妹，過往松岡在公司一人獨大，現在多個師妹，難免會爭寵，Kat則大讚松岡友善：「同松岡識咗年半，當時我喺韓國返日本，第一次見佢，覺得佢個人好友善，之後都見過好幾次面，每次佢都好好人，佢喺公司年資耐過我，但佢對我唔錯，喺日本帶過我去燒烤，好開心。」
發圍好時機
問到會否視對方為競爭對手？Kat說：「喺同一個機構，我覺得佢係人見人愛，兩個女仔發展模特兒工作，當然都會有比較，係有少少競爭，但會係良性競爭。（年輕係你優勢？）我係年輕過佢，但我都唔係超級年輕，對於後生過自己嘅人，我會感到壓力，所以佢都可能對後生過佢嘅人有壓力，但我會更加努力工作，希望做到第一！（你哋做唔做到朋友？）我哋已經係朋友。（松岡有冇畀意見你？）佢冇特別畀意見，可能佢想保持秘密。（想同佢一齊做嘢？）想呀！我諗會好有趣。」
疫境下，松岡留在日本多時，未能來港工作，變相造就Kat在港發圍的好時機，她笑說：「我都覺得係好時機，如果佢來港要接受隔離，哈哈！我喺日本做咗5年模特兒，但我想要新鮮感，喺日本開始有啲悶，依家想喺香港發展。（會向美國發展？）唔會！除非可以去到荷里活發展啦！」