張振朗連咀3女呻驚寧願打鑊甘
張曦雯昨日偕張振朗宣傳新劇，踢爆男友對她與羅子溢的咀戲有醋意，並拒絕評論；而張振朗則咀勻3位女主角，看似艷福無邊，他卻寧願拍100場打戲也不想Kiss！
台慶劇《踩過界II》演員張曦雯（Kelly）、蔡思貝及張振朗等昨日出席活動，主角之一的王浩信身在內地工作，而早前暈倒送院的秦煌則在家休養，但雙雙拍片為拍檔打氣！早於今年4月約滿無綫的雪妮，席上獲贈鮮花及心意卡，感動得眼濕濕。
唔怕觀眾睇厭
《踩II》緊接Kelly另一劇集《木棘証人》播出，她不擔心觀眾睇厭：「我都好耐冇出劇，而且再下一部最快都要明年底，希望大家唔好睇厭我，因為之後要隔一年先再見到我。」提到在《木》劇跟羅子溢的馬拉松式咀戲，她透露當時與男友分開睇，問到男友反應？她說：「佢話好Sweet、好熱情！佢可能有啲呷醋，但冇直接講，佢話唔講錫嗰度，你係做得好好。（點氹番佢？）錫番佢一啖。（今次有冇咀戲？）同王浩信有一場借位，同張振朗冇得借位。（男友冇眼睇？）佢要習慣睇多啲，佢睇到眼火爆，證明我成功！」
至於張振朗除了跟Kelly有咀戲外，與姜麗文及蔡思貝亦有得Kiss，他笑言要多謝監製，但蔡思貝搞笑更正：「佢同思貝冇咀，係同『癲姐』（劇中角色）咀，有棚牙爭好遠！」問到哪個較好咀？張振朗避而不答，蔡思貝代解圍：「佢係好怕醜嘅男仔，好有紳士風度，同佢拍親熱戲好放心。」張振朗亦坦言緊張：「我寧願拍100場打戲，都唔拍1場親熱戲！」
此外，蔡思貝在《#後生仔傾吓偈》罕有談感情事，提到與德國男友的一段情，她指雙方仍保持聯絡，問會否為愛情棄事業？她說：「『癲姐』會，思貝就事業行先。（怕咗異地戀？）我比較隨緣，唔會分析咁多。」