歐倩怡冧唱情歌當郭晉安透明
郭晉安與歐倩怡結婚14年，前晚首度同台合唱，兩公婆「鬥驚」之餘亦不忘晒愛，揀選「冧爆」情歌，歐倩怡為了唔笑場，竟當老公透明！
前晚郭晉安與太太歐倩怡、米雪、黎芷珊等一同現身《流行經典50年》，她們首次夫妻檔同台合唱，歐倩怡選唱《萬千寵愛在一身》，實行Sweet爆全場，郭晉安透露是薛家燕邀請老婆出關，兩人都大叫緊張，歐倩怡說：「因為依家甚少唱歌，咁耐冇喺幕前，今次係超緊張。又冇返TVB十多年，入嚟都唔記得啲路點行，差啲迷路。」郭晉安亦指同老婆一樣咁驚：「我都未試過咁緊張，拍一場好難嘅戲都冇咁緊張。導演畀咗意見，希望畀人Sweet啲嘅感覺，始終我哋唔係做緊戲。」
黎芷珊憶錢國偉哽咽
兩人結婚14年，已屬「老夫老妻」，在台上對唱情歌，可會感到尷尬？歐倩怡笑言會出絕招：「會扮睇唔到老公，對住空氣唱。」郭晉安則不忘讚老婆：「佢本身係歌手，我係業餘，有佢喺度我定啲。（下次再合唱？）可以，睇吓觀眾鍾唔鍾意先。」下次會否揀倩怡的經典歌《櫻桃小丸子》主題曲？歐倩怡說不抗拒，還講笑叫老公扮「花輪」。太太樣貌身材都保養得宜，郭晉安不禁甜笑說：「因為有我喺度！講笑，佢鑽研營養學，讀緊碩士，食物和運動各方面好有心得。」
同場的黎芷珊提到早前離世的錢國偉時，一度哽咽眼紅紅，她說最心痛是看到錢國偉強撐，不停向朋友做OK手勢：「後期佢一路都唔敢瞓，驚瞓着會就咁走咗。」