李靖筠佩服逆市開業夠膽識
英皇老闆楊受成於逆市下開設新戲院，可謂甚具膽識與勇氣，3位新進藝人李靖筠（Gladys）、艾妮（Elly）、楊天宇（Angus）都十分佩服，他們亦分享了一些「沙膽」小故事，Gladys指自己讀大學時，曾經因貪玩試過深夜摸黑爬入學校泳池：「當時為咗避開保安，仲閉氣潛入水底，保安一走開，我哋即刻上番水，然後飛奔返宿舍，好驚但又好好玩。」
Angus亦有類似經歷，以前讀書時曾試過跟朋友去宿營，凌晨忽然興之所至齊齊玩宿舍攀爬：「當時我哋住喺2樓，有人提議不如用床單綁成繩爬落地下，當第一個朋友落咗地嘅時候，發現床單有啲裂咗，我當時都有啲驚，但最後都有落到去，之後大家再爬上嚟，當然呢啲只係一時無聊，依家諗番都覺得唔啱亦唔夠膽再做。」
至於Elly則笑言最大膽一次，便是獨個兒買機票去台灣：「當時有啲唔開心，就自己飛咗去台灣，去到台灣食咗好多嘢，即晚再返嚟，呢件事都算係我最大膽嘅事。」