錢國偉於圈中人緣甚廣，不少曾合作的藝人對其離世表示傷痛。
姚子羚：「《當四葉草碰上劍尖時》係我第一套參與嘅劇，都係因為Wilson搵我拍，我先有機會接觸演戲，佢算係我人生其中一個伯樂。」
唐詩詠：「拍《四葉草》時，佢從來冇架子，成日同我哋打成一片，我喺佢身上學到一樣嘢，佢係工作時工作，玩又可以玩得好投入嘅人，佢喺綜藝創作方面好出色，好多有創意嘅Idea，好多謝佢，有佢我先可以入到TVB。」
李思欣：「當年《赤沙印記@四葉草.2》係我入行第一套劇集，當年喺演藝學院畢業後，錢國偉親自揀人，係佢帶我入電視圈，聽到佢逝世嘅消息，好唔開心。」
梁漢文：「知好多朋友去醫院見佢，我嚟內地工作隔離之前，8月中去過醫院探佢，之前佢唔係好想大家擔心，唔係好見我哋，係近呢一、兩個月先可以再見。收到呢個消息有啲突然，希望佢安息。」
蘇永康：「我26號同許志安喺醫院陪住佢，但唔係睇住佢走，盡量喺佢耳仔邊鼓勵佢，叫佢快啲好番，同佢話我哋BIG FOUR又重組，佢講唔到嘢，畀咗個OK嘅手勢出嚟。佢女細老婆嫩，好唏噓，日後幫得就幫，希望佢太太堅強啲。」
連詩雅：「聽到呢個消息非常痛心。當年拍第一部電影係佢做導演嘅《喜愛夜蒲》，記得我仲係新人時，好多人質疑我，但佢一次又一次畀機會我，我會好好記住呢位伯樂。」
何珮瑜：「圍內之前有人話佢意識唔係幾好，估唔到就收到壞消息，好擔心佢太太同囡囡，希望一切安好。佢係眾人開心果，有佢嘅地方就充滿歡樂。」
監製衛世輝接受訪問，表示前日曾到醫院探望Wilson：「尋日下午去見佢時佢係清醒嘅，仲叫我個名。好傷心，真係唔認得佢，我揸住佢隻手，好似冇任何肌肉咁，個病折磨得佢好犀利。」