余香凝密冚凸肚 讚老公爆分
現年27歲的藝人余香凝近日驚爆未婚懷孕，下月與40歲的圈外男友陸政渡結婚。她昨日與張可頤等在尖沙咀出席ViuTV新劇《暖男爸爸》記者會，身穿兩吋粗踭鞋及以鬆身衫亮相，難掩上圍升Cup及腹部微隆，孕味甚濃。
婚後繼續拍戲
由於敬酒時未有飲香檳，余香凝被問到是否因為有BB，她笑說：「飲香檳就太早喇！（有冇作嘔作悶？）冇，身體好健康。（怕BB小器？）知道大家都好關心，有好消息先公布。（下月擺酒結婚？）唔想講真實嘅時間同地點，老公係圈外人，想保護佢。（唔請圈中人？）疫情唔想大搞，夢想嘅婚禮都係簡簡單單，最愛自己嘅人喺度就得。（拍咗拖幾耐？）唔想講。（求婚浪漫？）都係簡單。」
余香凝又否認老公是金融才俊，但不忘讚對方：「成日講恨30歲前結婚，因為遇到一個適合嘅人！由細到大都想有家庭，人生唔係淨係得事業，唔係為事業要犧牲所有，婚後亦會繼續拍戲，老公超級支持，佢係爆分嘅老公嚟。」並透露暫未定婚禮賓客名單，未知會否邀請舊愛陳家樂出席。