彭慧中寧缺勿濫 愛男士夠堅
現年31歲的無綫咪神彭慧中（Phoebe）雖然身形嬌小，但憑33C上圍備受注目，不時在社交網派福利，深受宅男喜愛。她謙稱不敢當「女神」稱號：「無綫有咁多靚仔靚女，我唔覺得自己特別標致。我心目中嘅女神係陳凱琳，之前合作過，覺得佢好靚、好好人，演戲、煮食同主持各方面都好標青。」
貴為「女神」的Phoebe竟自爆冇人追：「好多人以為我好多人追，但其實真係冇，我唔係講笑，都唔知點解！可能我每次拍拖就對其他男仔落閘，身邊所有異性就會唔見晒。」並公開唯一擇偶條件，最怕花心男：「堅持好重要，男仔追求嘅時候當然話好鍾意你，但我會睇定啲，睇吓對方係咪真心。佢要表現到好堅持先會打動到我，否則我就冇信心。」
不滿有肚腩
她自爆中學時期非常內向，直至15歲赴英國讀書後變得開朗，對自己更有自信，但她堅稱在網上晒性感相並非賣弄身材。外表完美的她坦言最不滿有「肚腩仔」，但又懶得做運動：「我好鍾意食，但又忍唔到口，同埋唔勤力做運動，所以要好好控制食量。最近多咗啲肉，新陳代謝踏入某個年紀就變慢，所以真係要的起心肝Keep Fit！」