江伊晴傻人有傻福 轉危為機
人妻江伊晴（Elanne）近日經常被問「係咪傻咗」，日前她在自己的貓酒店受訪，大笑說：「唔止網友，朋友都覺得我傻咗。依家市道唔好，少人去旅行，唔使擺貓喺貓酒店，但我仲咁博同拍檔夾咗近7位數，開間比以前大一倍、更貴租嘅貓酒店。」她指最嚴峻時營業額由6位數跌至4位數，自己要貼5位數強撐經營，她坦承有諗過放棄：「但呢個諗法只維持一個禮拜。做人同做生意一樣有高低潮，我覺得要為好景做好準備。」捱過最困難的兩個月後終現曙光，現食正時勢殺出血路。她振奮謂：「呢排好多人搞移民同屋企裝修，一隻貓住足幾個月，依家有19隻貓寄住，仲陸續有booking。」
食飽「攬仔」唔使做
Elanne在店內吸塵、分貓糧又清貓沙盤，十足「奴隸獸」。問她有否向老公Oscar要求減輕家務負擔？她竟說：「婚後我冇做過屋企嘢，食完飯連籮柚都唔使拍就走咗去，所有家務我老公做晒兼做得好，我只負責照顧個『仔』，即係隻貓，我係『家居垃圾』。（專職造人？）努力中，我老公好鍾意小朋友。（結婚都快兩年，係你定老公唔得？）咁你要問佢啦，都有朋友分享啲生仔偏方，但我怕中藥苦，有時又唔記得咗試。」大讚Oscar的她，可擔心100分老公被搶？她信心十足謂：「佢唔會(口架)，因為佢只鍾意啲花花草草。（拈花惹草？）畀佢隨便玩、隨便買。」
剛簽了新經理人公司的她，主力拍廣告及電視台工作，直言如工作要長時間離港也未必接。她否認婚後事業心減退，只是顧慮現有家室，不能讓老公獨守空房，連親熱戲亦可免則免：「我要尊重我老公，始終屋企有長輩，不過同老公佔有欲強無關。」
