羅仲謙有味笑話「加料」張曦雯兜巴星
羅仲謙相隔4年回歸視壇，新劇與張曦雯（Kelly）情海翻波，型男慘遭狠撇！朋友都非常羨慕他能與女神合作，謙謙亦「晒命」預告有火辣親熱戲。Kelly則打趣自嘲「港女入血」，奉命出手打人！
謙謙、Kelly與韋家雄等主演的無綫新劇《木棘証人》，將於10月19日晚上9時30分在翡翠台推出。這部警匪劇以非一般手法處理，除了嚴肅槍戰及追捕場面外，一眾演員又盡情發揮喜劇細胞，在疫境下為觀眾提供「甜點」。謙謙更放下靚仔形象，與家雄大講有味笑話，而女神Kelly則變身「強勢港女」，大騷巴辣本色！
劇情講述「木棘証人」家雄，獲警方派遣謙謙貼身保護，人際關係出現問題的他，與謙謙由鬥氣到漸漸變成好兄弟，原來二人的緣分竟與廿多年前一宗懸案有關。家雄的妹妹Kelly是大律師，謙謙女友張秀文見異思遷，造就機會給謙謙與Kelly漸生情愫，想不到秀文撞板後想食回頭草，三角關係錯綜複雜。
學做野蠻女友
談到今次演出，Kelly直言開拍前向前輩鄭裕玲「偷師」，她笑說：「我演呢個女強人唔係省油的燈，當懷疑謙謙翻撻秀文，我即刻飛佢，對謙謙造成傷害。拍拖期間，我又不時鬧佢，甚至出手摑佢同徐榮，巴渣得嚟貼地。我做準備嘅時候，有睇嘟姐（鄭裕玲）嘅《男親女愛》同全智賢嘅《我的野蠻女友》。（私底下都唔畀男友同前度聯絡？）唔會，我都有異性朋友，最緊要講得清清楚楚，唔好收埋。」對於首次與謙謙合作，她笑說：「我拍劇年資得兩、三年，而佢最後一套無綫劇係2016年嘅《潮流教主》，所以我哋試造型先首次見面，不過佢好專業同親切，戲裏戲外都為我提供唔少意見。」
戀女神惹葡萄
回歸視壇的謙謙則大讚Kelly聰明：「佢拿捏得唔錯，相信觀眾透過角色，可以睇到佢嘅可塑性。當落實同佢合作，我身邊啲朋友都不知幾羨慕！（艷福無邊？）我可以預告同佢嘅感情線有浪漫、有激烈，鏡頭拍得好靚，大家拭目以待啦！」他又表示今次與韋家雄合作，二人於劇本對白上花心思：「加咗啲我哋嘅Idea，好似有味笑話，相信觀眾會回味。」