簡淑兒反叛逃學諗番覺得低B!

藝人簡淑兒在無綫新劇被「怪獸家長」媽媽棒打鴛鴦,力阻「廢青」朱敏瀚追求。在美國長大的她表示戲中與媽媽的關係似曾相識,皆因現實父母的管教甚嚴:「細個唔畀去公園玩,只係有兩個地方可以去,一個係圖書館,一個就係佢哋識嘅朋友仔屋企!因為屋企有六個小朋友,所以管教特別嚴。」

搬到山旮旯變番乖

家教嚴厲有好處也有反效果,簡淑兒坦言試過被媽咪用窗簾棍嚴懲,可是棍下未有出孝女,初中反叛期更變身「逃學威龍」:「讀書成績一向唔差,但有段時間開始逃學!其實冇地方去,只係唔鍾意父母管得咁嚴,大個咗諗番覺得有啲低B,都唔知當時做乜。」嚇得父母為她「孟母三遷」,才讓她重回正軌:「當時屋企人即刻搬咗去好偏僻嘅地方,除咗樹林乜都冇,咁就又乖番正常咁讀書。」

小時候的簡淑兒不明白母親「一打六」的難處,18歲前除了不准去街,更遑論拍拖,她說:「細個同屋企人關係唔係咁好,直到讀大學住宿舍先覺得有屋企人係好幸福嘅事。返到屋企佢哋會煮好晒餸,又驚我餓親,會買晒罐頭畀我攞返宿舍,先明白佢哋好關心我。」近年劇接劇加上疫情,她透露今年仍未返美國探望媽媽,令她相當內疚。