郭富城撐老婆有天分 開騷全家比「舞」？

城城昨日偕主演電影《麥路人》的導演黃慶勳擔任網上節目嘉賓，並在影樓錄播，發放正能量。城城指疫情下發覺身邊不少朋友都有負面情緒，但他認為沒有事情是不可解決，建議大家在思想和身體上作出調節，例如做運動、吃甜品，設法令自己開心。

身為天王的城城自爆亦曾遇到困境，試過在演出前照太陽燈，期望曬出健康膚色，豈料忘記戴眼罩，導致雙眼發炎。他又曾在開騷時弄傷腳，要紮住頂硬上，亦試過拍戲扮「孫悟空」，卻對黐在身上的毛髮過敏，為免愈忟愈焦慮，當刻惟有自我調節心態。他揚言雖然有挫折，但絕少放棄，一定會堅持到底。

欣賞方媛自學挑戰

提到太太方媛近日學跳舞，卻遭網民留言惡評，身為舞台王者的他大讚太太有天分：「我冇時間教，但好欣賞佢。佢知自己跳舞唔叻，所以去挑戰，抽時間學，充實自己。我有睇過佢嘅跳舞片，OK呀！佢唔係上咗好多堂，睇到有天分，只係之前未發掘到出嚟。（遲啲演唱會一齊跳？）咁緊張？使唔使一家上台？大家開心就得。」他透露在家中會與兩個女兒一齊跳舞，大讚囡囡同樣有天分，笑說：「遺傳因子，佢哋非常活躍！」

至於有指他早前捐出100萬助電影基層工作者紓困，城城說：「交畀公司處理，可以出一分力等如仁慈，會盡量幫人，唔係淨係錢，要真誠真心。（有冇教兩個女都秉承助人精神？）佢哋細個未必知，但有教禮貌上，凡事要感恩。」