菊梓喬閃現《C9特工》一姐變臨記

菊梓喬（Hana）近年揮低吳若希、連詩雅等勁敵，連奪無綫《勁歌金曲頒獎典禮》兩屆「最受歡迎女歌星」，站穩一姐地位！近日有眼利網友發現，她於兩年前拍攝的劇集《C9特工》中，降呢做「臨記」！Hana於第15集中扮演健身室顧客，黎諾懿及朱敏瀚在她身後行過，過場僅兩、三秒，連對白都沒有！

「我真係做Gym」

Hana沒有在社交網透露拍過《C9》，但黎諾懿則上載片段並踢爆：「找亮點，能見到我偶像嗎？」Hana大方回覆：「原來有靚仔喺我後邊。」一眾粉絲留言開心見到Hana，不過亦有人指她堂堂「星夢一姐」，竟然要做臨記！其實近年愈來愈多女歌手加盟星夢，其中JW來勢洶洶，甫加盟便獲「欽點」拍劇做女主角，反觀Hana拍了3、4套劇，但都是戲份較輕的角色。

Hana昨日受訪解釋做臨記是美麗的誤會：「嗰陣我真係做緊Gym，點知有人叫我，原來係黎諾懿成班拍劇，佢哋租咗場，叫我繼續做Gym，我唔介意，佢哋影到咪影囉，只係咁啱影到我。（唔介意被人誤會做臨記？）其實我都唔算係臨記，係路人咋，哈哈！（有冇騷錢？）冇呀，我嗰時未知，因為係兩年前拍，如果早知叫佢哋畀個角色我做。」對於外界將她與JW作比較，Hana謙稱：「JW係師姐，我係後輩，希望過多幾年我都有機會做女主角，所以要努力啲，每個人都唔同嘅。（話你一姐做臨記！）我從來都唔係一姐，我呢啲做細，有得做已好開心。」並乘機宣傳，叫大家留意之後她在《刑偵日記》的演出。

黎諾懿：佢係我偶像

而黎諾懿表示：「嗰日佢唔係客串，係我哋拍嘢佢做Gym，我誠邀佢幫我出兩秒鏡，佢話『冇問題，影咪影囉』，所以好多謝Hana，佢真係我偶像，我真係好鍾意聽佢唱歌。」另外，Hana的「死敵」吳若希早前在社交網上載扮死屍的相，自爆於首套劇集《老表，你好hea！》扮演一出場被車撞死的角色。