羅仲謙恨當視帝 睇齊楊怡

羅仲謙與楊怡結婚後予人「住家男」的感覺，他接受繽FUN星網推出的鷹金庫夾萬特約《娛場Ⅹ男人的秘密》訪問時自爆：「正常男人嘅誘惑？我絕對唔會話自己冇嘅，只係選擇做定唔做啫。囡囡滿足到我好多誘惑，依家好似多咗個女仔喺身邊咁，仲要係合法同合情合理，老婆唔會Say No。」

談起約半歲的愛女羅翊心（小珍珠），謙仔父愛之情溢於臉上，他笑言幻想16年後拖着囡囡上街：「期待佢長大成人，到時同佢去街，最好被人誤會我係佢男友。依家我會同太太講，一定要保持青春，絕對唔可以有老態！如果將來佢同我講好難識男友，係因為啲男仔唔夠我靚仔，都真係唔知應該開心定唔開心好。」身處這個世代，未必每位父母都「望女成龍」，謙仔坦言只想囡囡開開心心：「好似佢個名咁，『翊』係立地而飛，『心』係心曠神怡，佢唔成功唔緊要，我成功咪得囉，依家做嘢都係為咗佢將來鋪路。」

全家福鎖夾萬

於單親家庭成長的謙仔誓言自己的婚姻「一生一世」，即使有時與太太「火星撞地球」，但每次都會提醒自己要先讓步：「可能其他嘢我未必做得好好，但每次（爭吵）都一定係我開口氹番太太先，尤其係有咗囡囡後，覺得更加要處理好夫妻關係。有時因為小事好容易有拗撬，但我會同自己講『多做事、少說話』。話我老婆奴？互相尊重啫！我會提醒自己讓得就讓吓對方，火紅火綠又何必，尤其太太生咗BB後，都未瞓過一覺好嘅。」

凡事以家庭行先，謙仔透露將其中一張全家福鎖於夾萬內：「相框上有囡囡名字同出生日期。原本我想張全家福唔一定係一家三口，可以包括我爸爸同其他直系親屬，只係被疫情打亂陣腳，好耐冇影過相喇！依家希望疫情快啲過去，等我可以帶埋囡囡去拜好錫我嘅嫲嫲。」

唔介意做閒角

講到事業，謙仔直言年前於電影《西遊記》系列飾演「藍血沙僧」，影響他不少：「試造型嗰時已經流下男兒淚，每日化妝6小時，嗰段時間好大壓力。依家要搵奶粉錢，我未必可能揀戲拍，但遇到有挑戰嘅角色，少啲片酬，甚至只係男二、男三我覺得都要一試，因為好難講每次機會都可以為自己帶來啲乜嘢。」又笑言希望有朝成為視帝，與老婆「配成一對」：「我成個視后拎咗返屋企，諗諗吓香港好似冇Couple係咁，如果成功嘅話，都算係一時佳話嘛！」

facebook.com/eaglesafeshk/

場地：Pier 1929@灣仔碼頭