蘇玉華新婚開房：度度都玩吓！
藝人蘇玉華被本報揭與潘燦良入紙註冊結婚後，昨日首次公開現身出席活動。問到何時擺酒？她即表示：「結婚同搞結婚係兩樣嘢，我哋係鍾意結婚。」她笑言已屆適婚年齡，終於有時間完成人生大事，並分享去律師樓簽字的過程：「喺雙方家人見證下簽字、交換戒指，之後再振興香港經濟，住咗兩晚酒店。（有冇出門口？）間房咁大，度度都玩吓咁啦！」
提到即興登記註冊，她笑言最開心的是媽咪：「佢係好傳統嘅人，成日話點都要個名分。」然後自爆當日被爆入紙時膽戰心驚：「完全唔知記者可以Check到，記得嗰陣同潘燦良食緊Lunch，一睇到新聞就『大鑊！』因為當時媽咪仲未知，即刻打畀佢講我哋登記咗，唔想佢從其他人口中知道呢件事，如果唔係佢實嬲死我！」