余香凝伴舞 客串做SG
藝人余香凝與吳嘉熙（Cheronna）因合唱《天地分裂》而成好友，日前首次一同舉行音樂會，余香凝還「客串」做女子組合Super Girls（SG）成員與Cheronna合唱《鎂光燈下》，她笑說：「我識跳SG舞步，現場示範了幾吓，都跳得有板有眼。」反而Cheronna笑言忘記舞步。
講到今次開騷，余香凝表示想透過演出發放正能量：「因為疫情關係，社會氣氛唔係咁好，今次主題係蝴蝶蛻變，好似疫情咁，大家要留喺屋企，有時會覺得孤獨，但希望喺呢段時間，大家變成更好嘅自己。」Cheronna則表示起初擔心首次現場演繹合唱歌，因歌曲較高音，余香凝還曾提議全程用假音，但二人又欠信心，幸正式演唱時效果不錯。