陳曉華「初吻」益何廣沛 咀到缺氧
陳曉華昨日拍攝劇集獻出螢幕初吻給何廣沛，兩人咀足十多秒。事前何廣沛教對方拍咀戲「呼吸有害」，故她閉氣拍攝，卻感到缺氧頭暈。
藝人何廣沛與前港姐冠軍陳曉華昨日在西環為無綫劇集《異搜店》拍攝外景，兩人在海邊錫錫，相當浪漫。陳曉華拍到第四套劇，終於獻出螢幕初吻，她與何廣沛咀嘴時明顯有點緊張，兩人錫足十多秒，拍了三次便順利完成。
怕尷尬唔敢抖氣
何廣沛事前教陳曉華拍咀戲「呼吸有害」，閉氣可避免尷尬，但令她缺氧！陳曉華笑說：「佢教我要閉氣，但唔係好夠氣，有啲頭暈。」何廣沛解釋：「兩個人黐到好埋，如果正常呼吸係會感應到，互相呼吸係會尷尬嘅，所以提佢要閉氣，但係有次佢唔記得吸大啖氣，導演一直未嗌停，見到佢忍得好辛苦震晒，哈哈！」
拳頭當人頭 教拍「動作」戲
獻出螢幕初吻的陳曉華說：「第一次拍咀戲，初時心情好緊張，螢幕初吻嘛，但去到拍嘅時候就冇想像中咁緊張。廣沛好好，知道我第一次拍咀戲，佢用拳頭代替人頭，好冷靜、好理智去同我分析點拍。」拍攝咀戲經驗豐富的何廣沛相當淡定，他笑說：「我驚我嚇親佢，螢幕初吻，第一次冇經驗嘛，盡我所能去講，始終『動作』戲嚟，溝通好啲，尊重對手。」他又讚對方準備好香口膠、薄荷糖清潔口腔，陳曉華笑說：「我第一套劇已經期待緊，但一直冇機會拍，去到呢套終於獻出螢幕初吻。」