許芯悅哭訴遭侮辱 莊思明：佢係咪精神分裂？

藝人莊思明早前被爆與男友楊明拍戲時特地「貼身監視」，以防小三埋身，令到戲中與楊明演情侶的許芯悅被其凌厲眼神所嚇窒。前晚與邱芷微等出席帶貨王活動的許芯悅，受訪提起此事時突然耷低頭、手震兼全身發抖，沉默30秒後更開始爆喊，她說：「我唔可以講太多！出咗報道之後，收到好多長篇Message係咁鬧我，唔想受人哋人身攻擊、侮辱同詛咒我！（咩人？）有一個人，唔想提佢。」

自爆收封口令

許芯悅繼續哭訴，指「有人」叫她封嘴：「叫我唔好講呀！但點解事實唔可以講？我只係答咗幾句咋嘛，就咁樣？我覺得人與人之間最需要嘅係尊重！」更大爆「金句」：「我覺得唔係個個都會將自己畀人鬧嘅Message畀記者，去令到自己可以上到C1（頭條新聞），因為C1唔係最重要，錢都唔係最重要，就算矮做Model都唔代表人格差！」坦言為此事哭了很久，問到會否想平反？她說：「我覺得如果冇發生過一次或以上，都唔會畀人咁講囉！（搵楊明擺平事件？）我冇佢任何聯絡方式。」一眾網友卻「食花生」，笑她谷不出眼淚。

「公道自在人心」

對於許芯悅爆喊指受侮辱，思明則反擊對方：「佢呢頭喺我哋個電影群組度同我、阿楊講晒對唔住，估唔到報道出嚟會咁樣，依家出嚟見記者又話受侮辱，其實佢係咪有精神分裂？佢係咪靠老屈嚟呃飯食！好似我先係受害者喎！」隨後在社交網連續「發功」：「預咗啲講開大話嘅人係唔會咁容易收手㗎啦！你要繼續老屈作古仔博見報你咪繼續囉，公道自在人心！我又唔知你係邊個，同你講多都嘥氣。」又Hashtag「人在做天在看」及「你想利用我到幾時」等字句。

經過一晚後，思明心情似乎已平復，昨日晒出與愛犬慶生的照片，寧願玩狗都不想再理許芯悅。