崔碧珈坐正做女主角「峰」殺亞姐
36G咪神崔碧珈谷胸為主演新戲宣傳，搶去范莎莎與張可盈的「峰」頭！對於亞姐鬧「雙胞胎」，亞視高層陳偉傑表示是笑料一則，選美賽事繼續進行。
亞洲電視昨日於亞視大埔總台開記者會，宣布跟英國製作公司合作開拍一齣驚悚電影，邀請崔碧珈、兩位前亞姐范莎莎與張可盈，以及一眾外國演員演出。其中擔任女主角的崔碧珈身穿Deep V貼身長裙性感現身，比打扮密實的范莎莎與張可盈更搶鏡！她興奮地指跟英國製作公司一共有三個合作計劃，對開工大感期待。疫情之下，她表示在家密密網購，笑問單身的她可有網購男友？她笑言冇！中秋將至，她會與家人在家食飯做節，又自爆十年冇同媽媽去旅行，自認「衰格」，望疫情過後衝出香港：「最想同佢去巴黎、東京，之後出國做嘢都會帶埋佢。」
亞洲電視執行董事陳偉傑，對於有網上消息指亞姐競選因違規及涉嫌欺詐而暫停，內地方面更鬧出「雙胞胎」，他指純屬笑料一則，只是可能因疫情而押後香港區決賽，連日來都有跟準亞姐進行訓練：「2018、2019年授權咗一間內地製作公司營運，佢哋今年聲稱仲有授權，但授權書已經過咗期，我哋會採取進一步法律行動。」而講到亞視上周五遭一間印刷公司入稟高等法院申請清盤，陳偉傑表示是小誤會，涉及十幾萬的款項是「前朝」留下︰「好多問題都較為複雜，一時處理唔到，呢個數字我哋畀唔起嘅話，都拍唔到電影，已經聯絡咗入稟方嘅律師，會盡快解決。」而亞視方面昨日傍晚發聲明，指商標侵權一事已交內地律師處理，並指此事對2020亞洲小姐競選沒造成影響。對於有機構指稱獲授權並公布2020年亞洲小姐競選已於6月24日正式啟動，亞視澄清沒有授權該機構籌辦今年亞姐。
羅霖希望亞姐搞落去
另一邊廂，聲稱公司2018年已擁亞姐註冊商標的亞洲衛視台長劉先生接受訪問，並附上相關文件，指亞視現跟另一內地公司合作，絕不能用亞姐Logo：「我哋搞過好多屆亞姐大中華賽區、台灣區嘅賽事，去年冠軍江雨婷都簽咗我哋公司旗下，佢哋搞嘅話，頒冠軍嘅時候由邊個去加冕？個后冠冇咗商標又點做？如果咁搞落去，我覺得一定會係歷年最差。」
此外，前亞姐羅霖與有「亞姐之父」稱號的葉家寶，昨日出席網上福音記者會，被問到亞姐鬧雙胞，葉家寶說：「我相信亞洲電視一定係擁有亞姐擁有權，佢哋創辦，以我記得佢哋喺全球註咗冊，我相信其他機構唔知用咗咩手段，或者有啲法律罅，好似當年《包青天》都鬧雙胞啦。」而羅霖將任評判：「我知佢哋延後咗，可能因為呢個原因（鬧雙胞），我當然希望亞姐一直繼續搞落去。」