楊埕捱刀破相:兩個月都發噩夢

有「翻版張栢芝」之稱、曾參選港姐的楊埕早前因傷人案被捕,事件現已平息。她憶述案發過程中遭毀容並險死,事發後更慘遭朋友冷嘲熱諷及失去工作機會,令人生陷入谷底及情緒抑鬱發噩夢。提到受屈,她更激動落淚,不過自言已原諒傷害她的前男友,因覺得冤冤相報何時了。

楊埕今年6月與屈姓男友Marco發生桃色糾紛,事後她以涉嫌傷人被拘捕,Marco則以涉嫌「藏有攻擊性武器」、「普通襲擊」及「刑事毀壞」一同被捕。楊埕透露經警方搜證後二人均不獲起訴,事件已平息,她更坦言已原諒前男友酒後失控的行為。

靠化妝遮疤

重提糾紛,她再三強調自己沒有傷人:「我哋分咗手一段時間,當日趁佢唔喺度上去執嘢,後來佢飲醉由朋友抬返嚟,因為佢一直都想挽留我,所以情緒就好激動。我開門想走,佢激動到鍊住我條頸同拎刀,佢把刀𠝹到我塊面,我流緊血。(覺得自己會死?)我真係好驚,個腦一片空白。我想走,就見到佢無啦啦用刀整傷自己,當時我成面血,佢又成手血,之後我鞋都冇着就跑落樓報警。當警察同救護人員到咗之後,佢可能太愛(我)所以變成恨,同人講係我令到佢受傷,但最後搜證完真係唔關我事。」楊埕說時仍猶有餘悸,坦言現時臉上仍留有疤痕,要以化妝遮蓋,又指:「我坐得喺度同你哋講嘢,我係執番條命。」

事發後一段時間,因案件在調查中,她未能開腔澄清,被不少人誤會,接洽中的電影及一些工作亦叫停,甚至被朋友以難聽的說話去嘲諷:「我當時覺得好委屈,一沉百踩,試過食飯被朋友單打:『乜依家興玩刀?』」說時忍不住眼泛淚光,她講到當時有被屈的感覺:「就好似冇咗將來、好似畀人殺咗父母一樣。」而事件亦令到其家人十分擔心,提到家中90多歲的爺爺時,楊埕潸然淚下:「家人好擔心,我爺爺行動不便,佢睇到新聞好擔心,日日問我身邊所有嘅人。」

原諒前男友

雖然身心飽受傷害,但楊埕仍選擇原諒前男友:「佢後來酒醒,唔記得當晚發生咩事,佢都有say sorry,覺得係破壞咗我嘅一切,所以我原諒佢,冤冤相報何時了,我之前承受咗咁多壓力,真係好難過,我唔想對方承受我嘅經歷。」她指對方平日對自己很好,但酒後性格暴躁,坦承因其酗酒行為而分手。問到當時是否抑鬱甚至有過輕生念頭?她默默點頭,並說:「朋友好擔心,我真係好抑鬱,抑鬱到瞓唔到覺,又發噩夢,持續兩個幾月。」

其後楊埕在好友鼓勵及家人支持下,終於走出低潮,工作亦漸見曙光:「有間東南亞公司會合作拍電影,自己有間製作公司同日本料理到會生意,都會試吓網上拍片,好開心有路可以繼續行。」至於感情方面,她不諱言有陰影:「呢一年都唔會拍拖。(嚇怕追求者?)我唔知有冇嚇怕,但我都驚咗,原來拍拖會變成一個威脅。」